La Festa dël Piemont ch'a fà 41 n° 8, magg-giugn 2008, pag. 2 Bepe Sané (Dragonòt) La "Festa dël Piemont" a l’é ël 22 ëd magg, ël di dla promulgassion ëd lë Statut Regional, che a l’é stàit ël 22 magg 1971. Ant ij but ëd la Festa dël Piemont a-i é ëdcò col ëd fé conòsse ël patrimòni lenghì-stich dël Piemont e minca ann la Region a stabiliss j’antërvent, specialment për le generassion giovo. Un-a dle manifestassion st’ann a ven organisà da l’associassion Gopiedmont (gopiedmont.i-iter.org), con la colaborassion ëd la fondassion Vox Humanitatis (www.voxhumanitatis.com) e ël patrossini dla Region Piemont, dla Provinsa ëd Coni, dle aministrassion ëd le sità ëd Cherasch, Alba, Coni, Bra e dla Comunità Montan-a ëd Langa dle Valà. La Festa as anandia ël 21 ëd Magg e as sara ël 1 ëd Giugn. La Festa a l’ha un taj antërnassional almanch an doe ocasion. Ël 24 ëd magg, an Alba, an colaborassion con la Ca dla Comun-a d’Alba, a-i é ël "Rëscontr general ëd la Wikipedia piemontèisa" e l’ancontr con le magistre che a fan didàtica an piemontèis. L’event a sarà ëdcò trasmëttù an television, an direta an sla Ragnà (an sël Web). Da part ëd la fondassion Vox Humanitatis a-i sarà la sirimònia ëd donassion dij sevissi didàtich a le scòle che a fan cors ëd lenghe regionaj. Ij volontari a mostreran a le magistre dij cors com fé a dovré ij programa dla donassion e a faran ëd dimostrassion për fé vëdde com scolé e magistr a peulo fesse i sò lìber ëd test bele che daspërlor. Për la Wikipedia piemontèisa (pms.wikipedia.org) ël rëscontr a sarà n’ocasion për tùit ij contributor për conòss-se e për ancontré ij letor ëd la Wikipedia. A l’é la prima vira che la Wikipedia piemontèisa a seurt fòra dal mond virtual ëd la Ragnà e a ancontra ël mond real. Ël 31 ëd magg, a Cherasch, al Teatro Comunal Salomon e sota a l’Arch dël Belvëdde, a-i sarà ël "Rëscontr general ëd le Wikipedie an Lenga Regional". L’event a l’avrà motobin ëd partessipant che a rivo da lë strangé e tanti àutri che a saran colegà an video e an vos con "Skype" da tut ël mond. A së speta che a rivo specialment ij bavarèis e ij catalan e për ospiteje a sarà montà un camp ëd tende. An conferensa a saran presentà stòrie da tut ël mond an dzora aj problema e aj sucess ëd le lenghe cite, smonùe ansima a lë scherm panoràmich e aj pont multimojen piassà për la sità, tut dobià an piemontèis. La lenga ëd travaj a sarà l’anglèis. A sarà ëdcò presentà ël proget "Cun-a duverta", un proget che a toca tut ël mond e che a l’ha ël but ëd cheuje e ten-e vive le tradission ëd l’educassion an lenga local ëd le masnà pen-e nassùe. An prinsipi ’d Luj a Bangkok a-i sarà peui la conferensa dla ISO 639-3/UNESCO ansima a le técniche ëd salvatagi dle lenghe cite e la Festa dël Piemont a sarà presentà com "case of study". A peul ëdcò esse che la Festa dël Piemont a finissa ant ël Registr ëd le "Good practice" dl’UNESCO. N’àutra rason për nen podèj tiresse andré. Home Page Artìcoj an piemontèis