Pasolini

Sent agn da la nassita 'd Pasolini, a na discuto tuj, as publico articoj, arcòrd, lìber, as moltiplico le ocasion ëd parlé dle tante face dla soa vita e dla soa atività, ma pòch o gnente - almen a m'ësmija - dla part ch'a l'ha dedicaje al sò dialèt e a le soe ideje 'n sij dialèt, ën particolar ën na cita euvra ch'a s'ëntìtola «Volgar' eloquio», ch'a l'é nà da 'n rëscontr ëd maestro e 'd professor a Lecce dël 1975 (chiel a l'é mòrt gnanca 'n meis dapress) e ch'a l'é stàita publicà dël 1976, ma peuj arpijà da Gian Carlo Ferretti (da lese 'd chiel, publicà da Interlinea 'd Noara, «Pasolini personaggio», surtì na quinzen-a 'd di fa) 'n t'un-a edission dj'Editori Riuniti dël 1987. A-i é lì 'ndrin na bela discussion doa Pasolini a sosten soe rason a propòsit dij dialèt, nen mach come dialèt ëd poisìa, ma pròpe come dialèt ëd coltura e 'd comunicassion. Pa possìbil di 'n pòche paròle na posission bin antërsà, ma mi pijo 'nsissì l'ocasion mach për dì che 'l rëscontr a l'era stàit organisà da Tavo Burat e che Tavo Burat a l'ha parlane tante vòte, ma pì che cheicòs a l'ha cuijì ant un lìber ch'a s'ëntìtola «Lassomse nen tajé la lenga», cudì da Luis Magnani e Alberto Brizio për le edission dl'arvista ALP ëd Cossà. Da Pasolini a Burat mach për arcordé na bela fradlansa d'ideje, dont veuj pròpe torné a parlé n'àuta vòta. ëd Giovanni Tesio - da TurinSet ëd La Stampa dij 25 ëd mars dël 2022

Indietro