Valensan

A fa sempe gòj vëdde, travers ij lìber ch’an rivo, l’angagi che ant tut ël Piemont a va anans për la lenga e ij dialèt locaj. I l’oma arseivù sota le feste un lìber ëd mila pagine bin soagnà: as trata dël «Dizionario Enciclopedico del Dialetto Valenzano. La lengua e la stòria di Nóster Vég ‘al dialàtt » (edission Fantigrafica, con la tùa dla Sità ‘d Valensa, dla Fondassion Cassa di Risparmio di Alessandria, dël Lions Club Valenza Est, e ‘d Duemiladodici onlus : Isbn 978-88-97962-86-1). L’autor a l’é Stefano Verità, «imprenditore orafo di chiara fama», nen valensan ëd nassita (a ven da la « Romagna solatio, dolce paese »). Rivà a Valensa a sëddes ani a l’é angiagiasse a ‘mprende ‘l dialèt local, con studi e arserche che «diedero luogo negli anni alla compilazione di oltre seimila schede e al progetto del vocabolario». Ël dissionari publicà a l’ha pì ‘d 35.000 vocaboj, con proverbi e manere ‘d dì, nòte sul dialèt valensan e nòte ‘d grafìa. A l’é adressà ai sitadin dla Capital «del gioiello», ma a podrà serve ‘dcò a jë studios come strument ëd travaj e confront. As part da «Ababià» (celato all’altrui vista) a «Vuturnà» (cuoio ricavato dalla concia della pelle di vitello). An fond n’ «Appendice» con paròle dij mësté ‘d na vòta; ij fer dël mësté da Urefes; ij nòm dla fauna dël Pò, e jë stranòm, arciamà an epigrafe d’overtura dai vers ëd Tonino Guerra (Mi piacerebbe un cimitero senza lapidi, fiori, fotografie/…un luogo fatto solo di nomi e soprannomi,/perché questi sono più imperituri della cenere). d'Albina Malerba - da TurinSet ëd La Stampa dij 4 ëd fërvé dël 2022

Indietro