Barba Tòni

Coma i l’avìo scrivù pròpi al prim tòch ëd coste pàgine dël 2021, cost a l’é l’an sentenari dla nassita d’un dij pì amportant poeta dël nòst Neuvsent: Antonio Bodrero, Barba Tòni Bodrìe, Barbo Tòni Boudrier, o mach bele Barba Tòni. Nà a Frassino, Fraisso, an Val Varaita ‘l 1 ëd novèmber dël 1921 (mòrt a Coni ‘l 16 ëd novèmber dël 1999), sò pais, Frassino, a lo arcòrda saba 13 ëd novèmber con diverse inissiative, a parte da na «Passeggiata letteraria in paese sulle tracce di Antonio Bodrero », a la matin, e peui ant ël dòp disné na tàula rionda su « La figura d’Antonio Bodrero », con President dl’Unione Montana Valle Varaita e ‘l Sìndich ëd Frassino, e j’intervent ëd Diego Anghilante, Giuseppe Goria, Giovanni Tesio, Dino Matteodo, Gianpiero Boschero; e as finiss con na sin-a con menù « dedicato a Barbo Tòni » (info@unionevallevaraita.it;www.vallidelmonviso.it). Noi lo ricordoma sempe con grinor për sò angagi pì profond, ch’a resta e fa scòla, col ëd poeta, poeta ‘d soa tèra e ‘d soa coltura dle montagne, piemontèis e ocitan. Barba Tòni, fin-a ant la fisonomìa, gran testimòni dla tèra piemontèisa, a l’ha fongasse ancreus ant j’adoss d’un parlé e a l’ha savù fé s-cionfé le sorgìss pì gentile, s-cioplinante e novisse ‘d nòste lenga. Giogleur dla paròla, creator ëd poesìa-lenga e ‘d lenga-poesìa, soa euvra as peul lese ant le edission dla Ca dë Studi Piemontèis. d'Albina Malerba - da TurinSet ëd La Stampa dij 12 ëd novèmber dël 2021

Indietro