Armanach piemontèis

Arsèive ‘l Calendari piemontèis “La Memòria dël temp” për ël 2022, a l’ha fane pì gòj sta vira, përché bele se ‘l temp a cor tròp ampressa e sovens i vurerìo fërmelo, st’ani i vardoma a cola data con tanta fiusa e tanta veuja ‘d campesse daré dle spale costi doi ani ch’a l’han sagrinà tut ël mond. “La Memòria dël temp” a vanta na soa longa tradission, e a l’é publicà da l’editriss Il Punto-Piemonte in Bancarella (011/2238112; mailto:info@editriceilpunto.it, http:\\www.piemonteinbancarella.it). Come ormai da na partìa d’ani a deurb la prima pagina Bruno Gambarotta che a tìtola sò tòch “Il tempo ritrovato”, na riflession su lòn che ‘d bon i dovoma savèj gavé da ‘l tèmp sospèis ch’i l’oma traversà. E an giuto le foto d’antan, fiamenghe come sempe, ch’a scandisso ij mèis. E peui an compagno ij di, ij mèis, ij Sant an piemontèis e le fnestre an lenga piemontèisa ‘d minca mèis, soagnà da Michele Bonavero, dova i podoma ‘mparé còs a veul dì “Sté da Pocio”, o “Buté ansema la fam con la sèj”…e via fòrt; j’articoj ‘d Nico Ivaldi (“Gustavo Rol, il mistero del ventesimo secolo”) e ‘d Giorgio Enrico Cavallo (“La regina delle aie”); e la colaborassion ëd Beppe Lachello, Piero Bianchi, e ‘d Walter Ferreri dl’Osservatòri ëd Pin për la lun-a e soe fasi… Tra le fòto da segnalé cola dël “Mercato del Ghiaccio”, “La Locomotiva “Enza” allo Scalo del Vallino”; “Le case di ringhiera”, “La Carrozza di tutti”, l’ùltima fòto ch’a saluta l’an “Amore e guerra”…ma tute bele, da vardé e rivardé, spetand l’ann ch’a-i ven. d'Albina Malerba - da TurinSet ëd La Stampa dij 29 d'otóber dël 2021

Indietro