Gioann Giors Alion

Ant temp ëd sentenari, an Piemont a va nen dësmentià (e al l’é nen stàit!), che sinchsent ani fa, ‘l 12 ëd mars 1521, a vnisìa publicà an Ast “L’Opera jocunda” ‘d Giovan Giorgio Alione. L’Università ‘d Turin, Dipartimento di Studi Umanistici (coordinament ëd Lorenzo Ferrarotti), con la collaborassion dla Ca dë Studi Piemontèis e dël prof. Mario Chiesa, vàire d’àutre istitussion e con ël sostegn dla Fondassion CRT, a l’ha butà an camp diverse inissiative për arpijé jë studi su cost’autor, che ant la stòria dla leteratura piemontèisa a l’é una dle figure pì amportante: “l’opera di Giovan Giorgio Alione – a scriv Clivio ant ël “Profilo di storia della letteratura in piemontese” - con il quale la letteratura in piemontese annovera il suo primo scrittore di talento, che affidò le proprie creazioni migliori – le farse – al suo volgare, col quale amò giocare come in una festa sbrigliata di una lingua doviziosa di vocaboli e locuzioni…”. Dl’ “Opera jocunda”, le farse ch’a l’han fàit definì l’Alion ël nòst Ruzzante, ma a van pitòst viste nell’ “alveo della tradizione popolare del teatro francese” – a l’avìa dàit n’edission critica “pregevolissima” Enzo Bottasso, sota ‘l tìtol “L’opera piacevole” dël 1953. E Massimo Scaglione con ‘l Teatro delle Dieci a l’avìa portaje an sena con motobin ëd sucess ëdcò fòra dël Piemont. E peui d’antlora a son nen mancaje dë studi, ma a l’era dabon temp ëd buteje man an manera decisa e aprofondìa e a la larga…e ‘d torna porteje an sena. I l’avroma manera ‘d parlene. ëd Giovanni Tesio - da TurinSet ëd La Stampa dij 19 ëd mars dël 2021

Indietro