Gianrenzo P. Clivio

Quindes ani fa, ai 22 ëd gené, a vnisìa a manché a Toronto Gianrenzo P. Clivio. Na a Turin ël 18 ëd gené dël 1942, Clivio a l’é laureasse ambelessì ant ël 1962, ant ël 1964 a l’ha piait un Master a la Brandeis University e peui ël PhD an lenghìstica a Harvard. Catedràtich a Toronto, a l’ha mostà ant le Università d’Harvad, ëd Boston, dël Nord Carolina, a Heidelberg, e ‘dcò an Calabria e a Napoli. Antant a Turin, con Renzo Gandolfo e d’àutri amis, ant ël 1969 a fa nasse la Ca dë Studi Piemontèis e l’arvista semestral antërdisciplinar “Studi Piemontesi”, con ël but ëd porté anans, dacant a j’àutri studi, ‘d travaj për valorisé e fé conòsse ant ël mond la lenga e la leteratura piemontèisa. Për la Ca dë studi a l’ha publicà vàire studi e lìber. Sitoma mach, për arcordelo, ‘l “Profilo di Storia della Letteratura in Piemontese” publicà ant ël 2002, con ij doi volum antològich ch’a seguo dël 2003 e dël 2004; “Trenin, dësmore e buate. Poesiòte piemontèise pr’ij cit” (2001). Dël 2019, a sislé le inisisative dij 50 ani d’atività, la Ca dë Studi Piemontèis a l’ha cujì ant un bel lìber antitolà “Na lòsna an fior”, na racòlta dle soe poesìe an lenga piemontèisa, soagnà da Dario Pasero (con tradussion an italian e an inglèis): “Seurt, ant la sèira zolìa ch’as aramba,/me doss amis,/…/ seurt da la poer, da la sënner ch’a cimiss,/ e ant l’arfiajì dël vent/ d’amblé frisson-a!...”. Le paròle, jë studi, la poesìa a resisto al temp e a l’assensa, a arneuvo ‘l ricòrd për la fiama ch’as dëstissa nen. d'Albina Malerba - da TurinSet ëd La Stampa dij 22 ëd gené dël 2021

Indietro