Vijà piemontèisa 2020

An cost’ani dròlo, ‘dcò ‘l Consert ëd Natal/Vijà piemontèisa 2020 a l’ha ciapà baraca e buratin e a l’ha fait tramud an video. Ël consert tradissional ëd poesìa, canson e mùsica piemontèise che la Ca dë Studi Piemontèis a organisa tuti j’ani për Natal e che l’ani passà a l’ha organisà ansema al Consèj regional dël Piemont, a l’é stàit fait e butà an sla rèj come un video YouTube. Se a-i manca ‘l calor dla presensa, la part bela a l’é che un a peul vardesslo e scontesslo con tut l’arlass ch’a veul da soa ca, e miraco ansema ai Sò scaudandse a la fiama dla bin. Protagonista ‘d costa edission 2020, ch’as deurb con le Pive ‘d Valerio Franco (Gnomo), a son l’Orchestra Progetto Futuro Musica ‘d Vilafranca d’Ast (diretor ël magìster Aldo Sardo), ‘l duo Amemanera (Marco Soria e Marica Canavese), ij musicista Andrea Gorga, Gianni Melis, Vik Noello, Enzo Vacca, Martino Vacca, Scuola Comeraghs Comhaltas di Cúl na Sméar (Irlanda), con la partecipassion straordinaria d’Arianna Savall (ch’a canta an piemontèis!) e ‘d Petter Udland Johansen. L’ator Mario Brusa a les Gelindo e la poesìa “Natal” ëd Renzo Gandolfo, che fin-a da la prima edission dël 1998 a sara la Vijà për auguré a tuti un Bon Natal. Në smonomo në s-cianchèt. (Dëscarié ‘l video “Concerto di Natale/Vijà piemontèisa” dal sit www.studipiemontesi.it, o serchelo su YouTube). d'Albina Malerba - da TurinSet ëd La Stampa dij 24 dë dzèmber dël 2020

Indietro