Vittorio Foa

Chèich nùmer fa i l’hai parlà ‘d Massimo Mila e dle soe surtìe piemontèise, ma l’hai ‘dcò ‘mpromëtù ‘d torné a parlene. Ebin stavòta veuj parlé ‘d n’àut përzoné dle bojose fassiste ch’a l’é nen stàit da meno. Veuj dì Vittorio Foa, che scrivend ai sòj a dòvra ‘dcò chiel pì che n’espression piemontèisa: “roba da berlichesse i laver”, “giannissa” (për giaunissa), “marcia, plandrùn”, “quaiette”, “brutt e bun”. E peuj: “basta là”, “gadano”, “bagnetto”, “tagliarini” e via fòrt. E gnanca a manca nen ëd condivide con Augusto Monti, ‘l sò professor al Liceo D’Azeglio, la stima për le canson dël Broferi. Stima ch’a mosta ‘dcò për Nino Costa, coma scriv an na litra dël 23 d’avril 1942, ch’arpòrto, coma l’é giust, an italian: “Una ventata di aria torinese mi ha portato qualche giorno fa la lettura, sulle Vie dell’Aria, di una poesia piemontese di Nino Costa, in morte del principe Amedeo la quale voi pure forse avrete letta perché era stata pubblicata prima sulla Stampa della Sera Vi si ritrova tutta la consueta finezza ed il tocco delicato del Costa il quale, fuori da ogni convenzionalismo, riesce a mantenersi in una sfera di umanità semplice e dolorosa su un tema in cui è così facile slittare in esuberanze retoriche”. E d’àut da dì, ma a n’àuta vòta ‘l seguit. ëd Giovanni Tesio - da TurinSet ëd La Stampa dij 4 dë dzèmber dël 2020

Indietro