Calendari piemontèis 2021

Gavà che un a sìa pròpi matòt o matòta, ‘l viré dl’ani, ch’a marca n’an ëd pì, un pòch a greva. Ma për cost 2020 i l’hai l’ideja che tuti i l’abio maitass ëd volté pagina, e ‘d giontéje n’1 a cost 2020, con la speransa che tut a sìa ‘ndàit bin. Anlora an fa dabon pì gòj arsèive ‘l bel “Calendario piemontese”, “La memòria dël temp”, con col 2021 stampà lì bin gròss sla pagina d’overtura. A l’é ‘l calendare tradissional piemontèis che a pùblica l’Editrice Il Punto/Piemonte in Bancarella (www.piemonteinbancarella.it; info@editriceilpunto.it; tel. 011/2238112), che i peule trové fin-a ant le ca dla Pampa argentin-a, come a l’é capitame a mi. A deurb, coma ormai da diverse ani, l’articol ëd Bruno Gambarotta, ch’a l’ha ‘l tìtol pòrta boneur “Ce la faremo!”. Minca mèis a l’é arfestià da ‘d fòto d’antan, un-a pì anciarmanta dl’àutra, compagnà da ‘d longhe didascalie, coma cola d’avril ch’a mosta n’aula dë scòla për l’Arte Bianca dj’ani quaranta, dova as ten na “gara per avviluppatrici di cioccolatini”! A sara ‘l vir dij mèis, l’articol ëd Nico Ivaldi, “Con Italia ’61 Torino celebrava il futuro”, ch’a n’arcòrda che l’ani ch’a-i ven a saran ij 60 ani d’un-a dle pì amportante celebrassion ch’a sìo mai tnusse a Turin. Coma sempe peui ‘l calendare a l’ha ij sant piemontèis, proverbi, manere ‘d dì e vàire d’àutre ròbe, mersì a la colaborassion ëd Giorgio Enrico Cavallo, Michele Bonavero, Beppe Lachello, Piero Bianchi. E le “fasi lunari” ‘d Walter Ferreri. d'Albina Malerba - da TurinSet ëd La Stampa dij 27 ëd novèmber dël 2020

Indietro