Studi Piemontèis - 2020 - n° 1

Pontual come sempe l’arvista interdissiplinar «Studi Piemontesi», giugn 2020, volum quaranteneuv (soma squasi ai sinquant’agn…), scartari nùmer 1. Arvista rica d’argoment e eleganta ‘d figura: pagine ch’a respiro e as fan lese senza sfòrs (custion nen da gnente). Da segnalé ‘n cost nùmer – tra le varie session: stude, nòte, ritrat, arcòrd, document, recension, segnalassion – tanti articoj rangià con competensa da la diretriss Rosanna Roccia e da la responsabil Albina Malerba. Prim, l’ëstude ‘d Luciano Re sui pont sospèis dij parch piemontèis, ma peuj Paolo San Martino ch’an parla dle cassin-e e dle vile tra Piemont e Toscan-a, fin-a a Erika Luciano ch’a scriv ëd l’emigrassion dij matematich ebreu da l’Italia fassista. E ‘ncor le tante nòte, da Gian Savino Pene Vidari a Lorenzo Ferrarotti, a cole bin pressiose d’Onomastica piemontèisa (nen ëd tut peuss dì), ma am piass arciamé la nòta d’Alessia Anna Bortolamai su n’arvira (dël 1912) al manicòmi ‘d Colegn. Tra ij ritrat Isabella Stancari an fa savèj d’Alfonso Goldini, senògrafo dël Regio e Donato D’Urso ‘d Pietro Baratono, prefet e servitor d’Ëstat. Ma specialment curiosa tra ij document na litra inédita ‘d Gozzano presentà da Mariarosa Masoero. Për finì con le tante recension, che son le fior bariolà dël bel giardin. ëd Giovanni Tesio - da TurinSet ëd La Stampa dij 31 ëd luj dël 2020

Indietro