Gian Antonio Bertalmia

An coste pagine i sercoma sempe ‘d dé bele neuve, fé ij batiman a chi a s’angagia con passion, dedission, tanta bin a scrive, lese, bogesse con ardiman për manten-e vive la lenga, la coltura, le tradission dël Piemont. E darmage tante vòte venta ‘dcò ch’is arcòrd dj’amis che tant a l’han dasse da fé e che peui a son andasne pì an àut, oltre ij finagi dle montagne. Ant l’inissi dl’ani a l’han lassane doe përson-e che a van nen dësmentià. Gian Antonio Bertalmia (1941-2020) ‘d Carmagnòla: imprenditor con la passion për la stòria e la poesìa, autor, mach për fé quaiche sitassion, dla racòlta poetica “Temp përdù” an lenga piemontèisa; dël poema “Storia di Carmagnola”, ch’a conta an vers la stòria ‘d soa sità, e dël romans an piemontèis “Ël cel an ponta al dil” (Piemonte in bancarella, 2019). A l’ha ‘dcò scrivù për ël teatro; e a l’ha avù tanti arconossiment, a parte dal Premio Nazionale Cesare Pavese. E a l’é ‘dcò andasne Pierino Pellegrino (1935-2020) ‘d Siriè: tra ij fondator dël Sìrcol “Ars et Labor”, a l’é stàit l’animator, ël regista, l’anima e ‘l tropié dij Cors ëd Lenga e Literatura Piemontèis organisà prima da la Ca dë Studi Piemontèis con la Region Piemont, e che peui chiel a l’ha continuà a ten-e viv, e s’augurma che ancor a seguito, con sò impegn e soa passion franca e concreta. Doi amis ch’a mancheran tant a nòst travaj e a nòsta comunità. I-j salutoma con la grassia dla bin. d'Albina Malerba - da TurinSet ëd La Stampa dij 21 ëd fërvé dël 2020

Indietro