Angelo Agazzani

A l'han salutalo la "sua" Camerata corale La Grangia e tanti amis ch'a son vnù 'dcò d'an Fransa e tute part ëd Piemont ant la sala dël Consèj comunal ëd Givolèt, ch'a l'era dventà sò pais e soa ca: Angelo Agazzani (11 d'Otóber 1934 - 12 ëd gené 2020), grafich ëd mësté, ma tuta na vita dedicà a la mùsica, ai cant dla tradission piemontèisa. Un travaj d'arserca, d'armonissasion e 'd consert ch'a l'han portà 'nt tut ël mond nòst patrimòni popolar. Da fiolòt a 'ncamina con 'l Còro Cai Uget ëd Turin, e peui ant ël 1953 a fonda la "Camerata Corale La Grangia". Da col moment Agazzani e La Grangia a dvento na còsa sola, n'angage sensa sosta dë studi, su e giù për valade e campagne 'd tut ël Piemont an sla carzà 'd Costantino Nigra e Leone Sinigaglia. Premi, arconossiment, consert an Italia e an Europa, lìber e dischi, con la cossiensa e la volontà fërma dël mòt ch'a l'avìa daje la sbruvëtta "perché non tutto vada perduto". Ël "maestro" adess a l'é oltra soe montagne, ma sò travaj a resta, a resist e a testimònia ... e la Camerata corale La Grangia a continua e a continuerà cola antica e sempe neuva stra. d'Albina Malerba - da TurinSet ëd La Stampa dij 24 ëd gené dël 2020

Indietro