Monegasch

Tuti a conòsso Montecarlo e 'l Prinsipà 'd Monaco: nòm ch'arciamo a la ment lusso, paradis dle taje, vacanse, sgnor, bengòdi, palass, boteghe e giojere bërlusente, jet-set antërnassional. Dné, an paròle pòvre. Ma pòchi a san n'àutr lusso che ij monegasch a peulo concedse, sensa genesse 'd tuti ij foresté ch'a pianto afé e s'amuso ant col cit canton ëd tèra: pròpe për ten-e fërma n'identità local ch'arziga d'esse mangià dal diau dij pé daré dla blaga blagà, a l'han sernù coma pivò 'd conservé soa parlada monegasca, 'l "munegascu" (na sòrtr ëd ventimigliuso, ch'a sarìa 'l parlé dij teritòri Ligur ëd Ventimiglia, La Mortola, Grimaldi,..). Da tanti ani 'l monegasch a l'é materia d'insegnament obligatòria ant le scòle dël Prinsipà. E a Montecarlo a-i é n'Académie des Langues Dialectales dël Principauté de Monaco, n'istitussion tnùa an gran cont, ch'a cheuj dë studios da vàire part d'Euròpa, e che minca doi ani a organiza un rëscontr dë studi, che cost'ani as ten ël 16 ëd novèmber al Théâtre des Variétés "sous le Haut Patronage de S.A.S. le Prince Albert II de Monaco", sël tema "La langue génoise, expression de la terre et de la mer, langue d'ici et langue d'ailleurs". E a-i sarà fin-a na cita testimoniansa piemontèisa: mersì al travaj 'd Pacòt e d'" Ij Brandé " (na miniera d'òr !), i l'hai trovà un bel tòch sota l'ansigna dla "Fraternità Regional": "Poesìe monegasche 'd Luìs Notari", ch'i l'avrài 'l piasì 'd fé conòsse ai partessipant al rëscontr. d'Albina Malerba - da TurinSet ëd La Stampa dij 15 ëd novèmber dël 2019

Indietro