Volevo tornare a mia casa

Për tuta combinassion, damentre ch'i travajava su certe memòrie dl'ex manicòmio 'd Racunis, Giancarlo Giordan a l'ha da-me da lese 'n lìber ch'i peuss nen nen racomandé a chi a l'abia a cheur ëd fé na bela letura. As trata d'un lìber ëd memòrie ch'a l'ha scrivù (ò, diso mej, ch'a l'han scrivu-je) n'alpin ch'a l'é salvasse da la campagna 'd Russia e a l'é tornà con tuj j'ëstent a Racunis (e a l'é peuj "rangiasse" come dipendent dël manicòmio). Diso sòn - le coincidense a esisto - 'dcò përchè soma a sent'agn da la nassita 'd Nuto Revelli e saba passà son ëstàit a Cone a parle-ne come scritor. Lòn che 'mbelessì - 'n tël lìber ëd Piovan - a toca (grassie a le interviste 'd Giovanni Bonavia e a la scritura d'Andrea Capello) a l'é - pì che giustament - la stòria d'un paisan campà 'n mes a 'n diaulere da nen podèj capì e squasi 'l miràcol d'esse riussì 'd torné a ca. Ma pì 'ncora (se mai podèissa di-lo) a l'é 'l lengage: n'italian tut mës-cià a 'n piemontèis pien ëd sust ch'a fa macia e ch'a l'é peuj na tradussion (bin fàita) dël sò parlé. Parland parland m'arcòrzo mi 'd nen avèj 'ncora scrivù 'l tìtol dë sto lìber, ch'ënvito a sërchè: "Volevo tornare a mia casa" (a fa pensé nen mach a Nuto ma 'dcò a Mario Rigoni Stern e al sò "Sergente nella neve"). L'editor? L'Araba Fenice 'd Cone. ëd Giovanni Tesio - da TurinSet ëd La Stampa dij 25 d'otóber dël 2019

Indietro