Nìvole da Prim

"Nìvole ch'a van vers un mond përdù": a l'é la bela dedica che Remigio Bertolino (poeta an piemontèis che con ij sòi vers sempe pì a s'àussa anver orizont ëd poesìa d'anima e 'd carn e 'd cel e 'd tèra), a më scriv compagnand l'ùltim sò lìber pen-a surtì: "Nìvole da Prim. Nuvole di Primavera", publicà da Interlinea 'd Noara, con la presentassion ëd Giovanni Tesio ("Remigio Bertolino e il favoloso incanto della sua poesia") (pp. 140, €14,00; tiradura soasìa limità e numerà). Un lìber cost ch'a marca la "piena maturità letteraria" dël poeta monregalèis: "con coerenza estrema e consapevolezza discreta è il poeta che più di ogni altro riesce oggi ad allineare la poesia in piemontese - a scriv Tesio - ai risultati della più provveduta (e pur nei suoi limiti, più nota) poesia in lingua". Poesìa 'd silensi satì, 'd pòvri pòst solengh e bandonà, temp d'antan sensa temp sempe temp; paròle 'd tuti ij di ch'as cangio, për miraco e cheur ëd poesìa, an mistà d'orassion ancantà , an fàula ch'anciarma e a lus coma stèile lujenghe ant le neuit pì sombre dla vita. Un mond përdù ? Fòrse…ma seugn dël seugn d'ògni òm - "barca a la corent" - d'atrové "drinta ij cercc dla pèrtia/ij segret dël temp,/sò bal ao riond". d'Albina Malerba - da TurinSet ëd La Stampa dij 13 dë stèmber dël 2019

Indietro