L’Artistica ‘d Savijan a l'ha 50 agn

Sinquant'agn a son sempe 'n bel nùmer. Nòsse d'òr ch'a valo për tut lòn ch'i foma, ma stavòta am piass arcordé ij sinquant'agn ëd n'asienda piemontèisa che për ël piemontèis a l'ha nen fàit pòch. A s'ës-ciama L'Artistica 'd Savijan, un-a dle tipografìe pì avosà për la bontà 'd sò travaj. Për ij sò sinquanta L'Artistica a l'ha pensà 'd comisioné a Elio Garis ën monument (l'inaugurassion a Savijan, via Togliatti 44, vënner 14 giugn a sinch e mesa) ch'a mosta come la coltura dij lìber (ma pì generalment ëd la scritura) a viagia 'ncontra a l'infinì. Onor ai tre fondator, Giacomo Lorenzato (Nino), Daniele Martino e Luciano Leardo, ch'a l'han savù ten-e bon e ten-se 'nsema. Për lor i l'hai donca pensà d'ëscrive sto cit sonèt sensa pretèise: "Nino, che con Luciano e con Daniele/ seve rivà - na vita - al nòsse d'òr,/ s'a l'é bin ver ch'i l'eve spuà le buele/ a ten-e a fren për ij sòj còrn ël tòr,//veuj di-ve, e a l'é pa për l'ocasion,/ ch'i l'hai sempe pensà vòsta fusin-a/ come a n'esempe 'd vera vocassion/s'i l'eve pilotà con siensa fin-a// na nav da capitane coragios/ ch'a san combate 'l mar ën tle tempeste/ e a san cò fé le nòsse a pan e nos.// Travaj bin fàit, sapiensa 'd mincadì,/ cossiensa e sacrifisse, pòche feste:/ l'inteligensa e 'l cheur, gnent'àut da dì". ëd Giovanni Tesio - da TurinSet ëd La Stampa dij 14 ëd giugn dël 2019

Indietro