Esageroma nen

"Esageroma nen", a l'é 'l tilèt che Ginadoja da la cuvèrtin-a dël lìber a branda sota 'l tìtol. Parloma dla sconda edission dël travaj 'd Bruno Sartore për l'editor Giancarlo Zedde: "Balengo, Garìboja…La più completa raccolta di modi di dire in piemontese" (pp. 80, www.zedde.com, € 12). A l'é n'arserca che Sartore a l'ha fàit për chiel ant j'ani, e che adess a smon ai letor ant na neuva edission slargà: "Epiteti piemontesi più o meno offensivi": an ordin alfabétich da "A l'é bon për la toss" a "Viton"; e "Modi di dire": da "a bòce fërme" a "Zichin zichet". Për ognidun a dà nen mach la tradussion an italian (nen sempre facila tant a l'é s-ciass ël sens ëd serte paròle), ma 'dcò na cita descrission. Quaiche esempi ciapà sautërland tra le pagine: Falurco (di nessun valore, sciocco); gnàpi (buono a nulla); lòfi (persona boriosa e poco raccomandabile) vèrd come na gasìa (tirchio, avaro). Avèj la bëddra (avere la pancia prominente); esse un fërlingòt (ragazzo vispo, birichino, furbetto); ma vate a caté 'n cassul (va a farti friggere); tëgg/tëggia (ben in carne)… e via fòrt. Na manera 'd lese 'n piemontèis, fesse n'onsa 'd bon sangh… e capì 'dcò chijcòs dla manera 'd rasoné sla vita e sle përson-e dij nòsti vej…che miraco a bin vardé a peul fin-a vnine a taj ancora ancheuj! d'Albina Malerba - da TurinSet ëd La Stampa dij 24 ëd magg dël 2019

Indietro