Salon dël Lìber ch'a fa 32

Passà la burian-a ch'a sisla minca ani 'l Salon, la manifestassion pì avosà e pì bela 'd Turin e dël Piemont për chi a-j veul bin ai lìber e a la coltura, a l'é anandiasse: l'edission ch'a fa 32 dël Salon Antërnassional dël Lìber- Turin, sempe al Lingòt, fin-a al 13 ëd magg a sarà na librerìa inmensa giaiolà, giojosa, e s'auguromo s-cioplinanta come tute j'àutre. Për chi a les an piemontèis a l'é l'ocasion pì galupa e festosa për andé a l'arserca djë Stand che a l'han an giojera ij lìber mal fé da trové ant le librerìe. Blamblinand për ël Lingòt trovroma j'editor piemontèis che a fan tendensa: Viglongo (pad.2-stand H22), Centro Studi Piemontesi-Ca dë Studi Piemontèis (pad. 2- stand K01), Neos, Alzani, Capricorno, L'Artistica Savigliano (a l'OVAL - nuvità 'd cost'edission- stand U 131), Interlinea (Oval-stand X05), Il Punto-Piemonte in Bancarella (Oval - stand X17, Araba Fenice, Dell'Orso, Fusta, Graphot, Lindau, Edizioni Savej-Fondazione Enrico Eandi (pad. 3- stand 35)… a son mach citassion campà lì, përchè 'l Salon ëd Turin an cissa a andé a dësnicé j'editor pì segret e originaj. Ël tema dël 2019 a l'é "Il gioco del mondo/ 'l gieugh dël mond": alora tuti a dësmoresse al Salon con ij lìber, le paròle, la blëssae j'odor dij papé…e dòp sin-a as va anans për contrà e piasse 'd Turin. d'Albina Malerba - da TurinSet ëd La Stampa dij 10 ëd magg dël 2019

Indietro