Ij Ghëddo

Se i durboma 'l REP (Repertorio Etimologico Piemontese) a la paròla " ghëddo ", i trovoma, prima dla spiegassion etimologica, che an cost cas a l'é motobin angavignà, la tradussion an italian " tono, stile, modo, grazia, garbo ", na paròla s-ciassa 'd significati malfé da rende an italian. N'operassion motobin anteressanta, anche da la mira lenghistica, a l'é cola ch'a l'han fàit tre amis, che na sèira për azar ant un pub (n'òsto) a l'han decidù d'amblé d'angagesse për porté an sle sene un repertòri musical dël Piemont, ripensà a la mòda d'ancheuj. Dit fàit, a son butasse ansema, ses musicista pì na vos e a son dasse nòm "Ij Ghëddo" (lor a lo scrivo nen pròpi da bin…darmagi). A l'han un repertòri ch'a va da le veje canson popolar, a Gipo, Buscaglione, Paolo Conte e d'àutri cantautor meno avosà. La prima vòta, l'ann passà, a l'han sonà e cantà al pub Revenge 'd via Coni 8 ('l porton prima dël 6 'd via Coni 'd Gipo); e peui pròpi dal pogieul dla ca 'd Gipo për l'inissiativa dle "case illustri aperte". E 'l 13 d'avril a 9 ore 'd sèira al Teatro Provvidenza 'd via Asinari di Bernezzo 34/A, a faran ël prim consert da un palch: "Il Piemonte attraverso la sua musica ". Chi a vurèjssa andeje a basta ch'a telefona al n. 011/7764744 (Gruppo Alpini Borgata Parella). Për conòssje vardé la pagina facebook I Gheddu. E adess ij nòm ëd costi giovo: Daniele Ollino a la froja; Laura Mazzone, vos; Italo Paganotto, froja; Didi Bertot, baterìa; Franco Molinar, bas; Franco Lavagna, fisa; Dino Dileno, tastiere; Gianni Cataldi, fònich. A l'é pròpi 'l cas 'd dì con Nino Costa "…Quand che ij pare a stago ciuto/s'ancamin-o ij nòstri fieuj"! d'Albina Malerba - da TurinSet ëd La Stampa dij 12 d'avril dël 2019

Indietro