Doi rëscontr

An cost mond baravantan a fan nen tant ciadel e gnanca notissia, ma a–i son tante përson-e e istitussion ch’a travajo ‘d bon-a len-a për la stòria e la leteratura piemontèisa, për ten-e visca nòsta siviltà. Parèj an fa gòj segnalé doi rëscontr dë studi ch’as ten-o un apress a l’àutr për arcordé e studié doi poeta piemontèis motobin soasì. Saba 9 ëd mars, a ancaminé da doi bòt dël dòp disné, a Pianëssa (cine Lumiere, via Fratej Rosselli 19), për inissiativa dla Comun-a ‘d Pianëssa as tnirà ‘l randevó dë studi dedicà al poeta Camillo Brero, ant l’aniversari dla mòrt (1926-2018), che për tuta soa vita a l’ha tnù àuta la fiama dla lenga e dla poesìa piemontèisa (info:virgilio@comune.pianezza.to.it).. E duminica 10 ‘d mars, a doi bòt e mes, a Lans, salon LanzoIncontra (piassa Real), la Sità ‘d Lans e la Società Storica delle Valli di Lanzo, con la colaborassion dla Ca dë Studi Piemontèis, dla Comunità Ebraica e dl’Istituto Piemontese per la Storia della Resistenza, as tnirà ‘l convegn dedicà a “Ines Poggetto, anima intensa delle Valli di Lanzo”, a sent’ani da la nassita. Ines Poggetto a l’é stàita na protagonista dla coltura ‘d Lans e soe valade, ma ëdcò na brava poetëssa an lenga piemontèisa, magistra d’umanità e ‘d coltura, ch’a l’ha butà ‘l cheur ëd sò savèj nen al servissi dij savant, ma al servissi ‘d soa gent e ‘d soa tèra (mailto:info@societàstorica-dellevallidilanzo.it). d'Albina Malerba - da TurinSet ëd La Stampa dël 1m ëd mars dël 2019

Indietro