Vijà piemontèisa

A festegia l'edission ch'a fa XX la "Vijà piemontèisa", consert tradissional ëd poesìa, canson e mùsica piemontèise che la Ca dë Studi Piemontèis a organisa tuti j'ani…vers ël Natal. La Vijà 2018 soagnà a festa për ij sò vint'ani an dà rendevó saba 15 dë dzèmber a quatr e mesa dël dòp disné all'Auditorium Vivaldi dla Biblioteca Nassional Universitaria 'd Turin, an piassa Carlo Alberto 5 bis. Protagonista 'd costa edission fiamenga a saran: l'Orchestra Progetto Futuro Musica 'd Vilafranca d'Ast (diretor ël magìster Aldo Sardo, con la colaborassion dël magìster Martino Vacca); Amemanera (Marco Soria e Marica Canavese) ch'a torno dòp un pòchi d'ani a la Vijà; l'Esemble Pianà (Enzo Vacca, Gianni Melis, Vik Noello), le Pive 'd Valerio Franco, e l'ator Mario Brusa. An programa poesìe da Brofferio a Pacòt, Brero, Giovanni Tesio, a "Natal" ëd Renzo Gandolfo, 'l fil d'òr ch'a gropa le Vijà fin-a da quand a son anandiasse ant lë dzèmber dël 1998, al Teatro Carignan. Tante le canson: da la "Camisin-a" 'd Nino Costa, a "Òi s'a veuj" test e mùsica 'd Marco Sorìa; a "Stèilin-e 'd fiòca" 'd Luigi Olivero, da "Viaggio a Betlemme" a "A me manera" a "Suite 'd Natal" e via fòrt. La Vijà, "veglia", a l'é n'anvit e speté e sente 'l Natal con le vos dla poesìa e dla mùsica che da sécoj a parla an piemontèis, ch'a veul ëdcò esse na festa dla speransa, dl'arcòrd, dla continuità e dl'arnassensa. La plaquetta con 'l programa e ij test as peul tiresse giù dal sit www.studipiemontesi.it. d'Albina Malerba - da TORINOsette dLa Stampa dij 14 dë dzèmber dël 2018

Indietro