Gipo

Fin-a a l'8 ëd gené a l'é duvèrta a la Biblioteca dla Regione Piemont "Umberto Eco" (via Confienza 14, Turin), la mostra, soagnà da la Fondassion Caterina Farassino, che 'l Consèj regional dël Piemont a dedica a "Gipo Farassino. L'uomo, l'artista, il politico": fòto, dischi, litre, "cimeli", spartì, canson, lìber, poesìe ("A son peui mach canson?" la racòlta 'd 64 canson-poesìe scrite da Gipo Farassino ant j'ani ch'a van dal 1965 al 1982 publicà da la Ca dë Studi Piemontèis ëd Turin e da temp esaurì). A l'é coma se Gipo a fuissa 'ncor ambelessì, a parlene 'd "coj ani che ij giovo 'd vint'ani/ a ricorderan nen,/ Pòrta Pila a col temp là / co' ij sò banch e ij sò mercà,/ l'era come na gran festa… "; inmagini ch'an conto e an canto la vita, la gent, le manera d'un temp, d'un pòst ëd costa sità: ch'as pensa a "Maria dij Gat" o a "Sangon blues" o a "Giovanass ", o " Al 6 'd via Coni ", o "Cor nen va pian" (Podèj torné /për un moment masnà,/ podèj torné/ a core 'n mes dla stra), a "Montagne dël mè Piemont" (che base an front sta mia sità ;/Montagne dël mè Pais/ ch'i sghicie l'euj al Paradis,/ porté lassù 'nt ël cel/ ij seugn d'ën bogianen)... Memòria, testimoniansa, e sensa gena, 'dcò nostalgìa… " Bisogna vivere una città - a scriv Bruno Quaranta ant la presentassion dël catalògo - fino a diventare una pietra. A qualcuno è accaduto di diventare una pietra angolare, come Gipo, fra le sentinelle di Torino… " (info: tel. 011/5757371; biblioteca@cr.piemonte.it; catalogo in distribuzione gratuita o scaricabile on line http://www.crpiemonte.erasmo.it). d'Albina Malerba - da TORINOsette dLa Stampa dij 30 ëd novèmber dël 2018

Indietro