Agenda dël Piemont 2019

A resist e a seurt con precission sabauda l'Agenda dël Piemont (Piedmont's Diary) 2019, an piemontèis, italian e inglèis, che st'ani a armarca, sota l'ansëgna "Orgoglio piemontese", vàire ricorense: ij tre sécoj dl' "acqua 'd Colònia", ij 100 ani dl'Auròra, 'l prim vòl ëd n'aeroplan, ij primi 50 ani dla Ca dë Studi Piemontèis, ij sent ani dle buàte Lenci, e vàire d'àutre date ch'a fan ëd nòst Piemont na tèra antivista che da sempe a sa anticipé ij temp. A la pùblica l'Associassion Coltural "Luigi A. Olivero" (via Gentileschi 1, Villastellone, Info: assolivero@libero.it). N'agenda-lìber (da ten-e peui an Biblioteca!) ch'an compagnerà për tuti ij nòsti di dël 2019, con ij Sant piemontèis, proverbe e manere 'd dì, la lun-a, e tante notissie dë stòria nòstra. La "Tàula" an presenta j'argoment 2019: orgheuj piemontèis, coma l'oma già dit; le date stòriche dova as ricòrdo La Mòle e ij sò 130 ani, la tragedia 'd Superga, 'l Proclama 'd Moncalé, ecc.; ij "Compleanni": Giovanni Toselli e 'l teatro an lenga piemontèisa, Silvio Pellico, Pinin Pacòt, Norberto Bobbio, Fausto Coppi, Luigi Olivero e tanti d'àutri. Le canson ëd Gipo. E a manco nen le "Ricette piemontesi". A costa Agenda fiamenga a l'han travajà Massimiliano Pampaloni, Gioventura Piemontèisa, Luigi Griva, Stefano Appiano, Giovanni Delfino, Giuseppe Pavesio, Manuela Paladini, Diego Lucco, Gianalberto Miglio e d'àutri. Proget gràfich ëd Riccardo Gandiglio; cuvertin-a 'd Nadia Celeghini. d'Albina Malerba - da TORINOsette dLa Stampa dij 16 ëd novèmber dël 2018

Indietro