Trasse a Salusse

Mi chërdo che daspërtut a-i sarìa damanca 'd na guida për compagné ij nòsti pass doa che 'n doma. E a l'é forse për lòn ch'am piaso ij lìber ch'an giuto a visité sità e paìs. Come cost d'Alberto Gedda, ch'a s'ëntitola "Tracce" (Fusta Editore, pp. 156, euro 19) e ch'a va a l'arserca dle còse pì stërmà 'd Salusse: 'd cola ch'a fan ëmnì - coma ch'as dis - la salivëtta. Testimonianse sbiavà për ëd visitator atent, a scriv Gedda, ma 'dcò la gòj dë scheuvre na sità 'd blëssa strasordinaria e fin-a mascheugna. Nen mach la Castiglia ("Castel ch'a stèila", a scrivìa Barba Tòne Bodrìe) o la catedral o san Gioan o Casa Cavassa o la ca doa a l'é nà Silvio Pellico, ma ij particolar ch'a-i va chi an mosta come armarche-je. La frësca 'd San Ciafré, la meridian-a 'n piassa Santa Maria, la lunëtta dla capela 'd San Bas-cian, le decorassion dël borgh ëstòrich, le ansëgne antiche 'd j'esercisse 'd comerse, l'erbo genealògich dij Marchèis, s-cianch ëd piture, faciade restaurà. Gnun-e esagerassion ëd paròle ch'a compagno, ma n'anvit discret a vardé 'n su, a ten-e dament le marche ch'a fan nen forse "monument", ma a diso d'un pòst se nen pròpe 'd pì, cheicòs che al pì as compagna e a dà 'n son tut sò: coma dis Marc Augé, sentiment dël temp ch'a passa e 'nt l'istess temp a dura. ëd Giovanni Tesio - da TORINOsette dLa Stampa dij 9 ëd novèmber dël 2018

Indietro