Porton ëd Palass Turinèis

Dedicà ai turinèis, e ai turista, che almanch na vira a son fërmasse 'mbajà da la blëssa d'un porton dij palass turinèis, a l'é pen-a stàit publicà 'l lìber, an piemontèis e an italian (aranda, con la midema 'mportansa), 'd Sergio Donna, "Portoni di Palazzi Torinesi/ Porton ëd Palass Turinèis" (edission Ël Torèt/Monginevro Cultura, 2018, pp. 128, con tante bele fòto a color ëd Vittorio Greco. www.monginevrocultura.net; telef. 011/0437207). Al travaj 'd Sergio Donna (un monsù dij pì angagià ant la valorisassion ëd nòst patrimòni coltural e lengìstch turinèies e piemontèis), as gionto ij test ëd Francesco Albano, Michele Bonavero, Luigia Casati, Achille Maria Giachino, Milo Julini, Anna Perrini; e le canson e le mùsiche 'd Beppe Novajra (che con Donna ormai a l'ha un sodalissi d'ani d'angage), prefassion ëd Piero Abrate. Ël lìber as peul lese donca da diverse mire: cola galupa dle bigieuje fiamenghe dij porton - da via Santa Chiara, ex ospidal "dei Pazzerelli", al porton neuvsent 'd Palass Lancia 'd via Monginevro an Borgh San Paul, passand për ij porton ëd piassa San Carlo, daj porton e cancej dël Ghet, a coj 'd cors Stati Uniti e 'd via Ottavio Revel - cola dle curiosità stòriche e leterarie, e cola dla blëssa 'd nòsta lenga, bon-a a conté 'l bel e j'angavign artistich e stòrich ëd nòsta sità. E fin-a canteje: "Porton massis ëd rol,/manoje lucidà,/ porton d'un temp passà/ con ròl da Capital". d'Albina Malerba - da TORINOsette dLa Stampa dij 2 ëd novèmber dël 2018

Indietro