Festival dle canson da trifola

Giusta doman, saba 27 d'otober, a neuv ore 'd sèira, a la Montà (d'Alba), n'ocasion për passé 'n pò 'd temp a l'ansigna dla trifola. La stagion a marcia, la trifola st'agn sì as treuva bondosa, e a Montà, ch'a sarà sede dël Museo dedicà a la trifola bianca ('nt le ròche a foson-a), as ten la quarta manifestassion dël Festival dle canson da trifola, ch'a l'é nà da n'ideja 'd Luciano Bertello e che d'agn ën agn as fa sempe pì bela. Na manera për deje vita a 'n fòlk nostral, a le canson ch'a nasso 'nt'un-a tradission ch'arneuva 'l canté (o 'l cantariné) pì popolar. Arcordand Secondo Gallizio, dla frassion ëd San Ròch ëd Montàud, ën musicista ch'a l'é fasse da chiel e che tan a l'ha sonà 'n tij baj a palchèt, a montran sël palch ses cantant o grup, da Sandro 'd Prunej a Pino Milenr a Aurelio Seimandi al Brav-òm, fin-a a 'n grup d'Istria, pais ëd trifole e 'd trifolau, ch'a compagnerà ën cantant, Sergio Pavat, che 'n patria a l'é motobin avosà. Ën tuj ij cas, nen mach canson (giudicà da tre giurie), ma cò d'àut, com dì le registrassion che Ugo Giletta, n'artista 'd Salusse, ma 'd nòm internassional, a l'ha fa-je a le dòne dij trifolau, che le trifole a-j vendo ma a-j cusin-o e mangio cò lor. Lìbera l'intrada a esauriment dij pòst. ëd Giovanni Tesio - da TORINOsette dLa Stampa dij 26 d'otóber dël 2018

Indietro