Fòlk piemontèis

Al 24 ëd giugn, di 'd San Gioan a San Steo (Roé) a l'é staje na bela manifestassion an sël fòlk piemontèis, mùsica cant e danse dai teritòre dël Piemont. Pa, tutun, na manera për confinesse 'nt'un particolarism sensa dëstin, e nopà na (bela) manera 'd rasoné 'n sël dëstin dël fòlk come manifestassion 'd tute radis: radis ch'a viagio, radis ch'as bogio, radis ch'a van e ch'a ven-o, mës-ciand-se tra passà e doman: mës-ciand le paròle, mës-ciand ij son, mës-ciand le lenghe, le costume, le emossion ch'an fam òmo e a fan ëd noi na realtà anvërtojà. Ën cost at ëd riflession a l'han dàit na bon-a man ij Mau Mau, 'n grup motobin avosà, nà 'nt j'agn Novanta da l'ancontr ëd Luca Morino, Fabio Barovero e Bienvenu Nsongan. Mau Mau a l'é già daspërchiel na bela manera 'd definisse, come volontà d'arcordé 'n grup ëd liberassion anticolonialista ('n Kenia), ma 'dcò - e forse 'ncora 'd pì - come intension d'arcordé la definission dëspresiativa ch'as dasìa ai meridionaj o a tuj coj ch'a l'ero vist come invadent, portador ëd mentalità ch'a fasìo difidensa. Ebin, ënt un-a bela ciaciarada Morino e Barovero a l'han parlà dle intension dël grup e a l'han laudà lòn ch'a l'ha possa-je a butesse 'nsema. Na còsa sempia: mës-cé son e paròle 'n cola difìcila ch'a l'é la mzura 'd na canson. ëd Giovanni Tesio - da TORINOsette dLa Stampa dij 7 dë stèmber dël 2018

Indietro