Giovo piemontèis ant ël mond

Frossach a l'é na bela sitadin-a ant j'anviron ëd Pinereul, sede dël Museo Regionale dell'Emigrazione dei Piemontesi nel Mondo, e sòn a na fa na cita "capital" dël Piemont, përchè a l'é dventà ant j'ani tapa obligà dij piemontèis che da tute part a artorno a l'arsèrca 'd soe radis. Mersì a l'atività dl'Associassion Piemontesi nel Mondo, sota la regia ferma 'd Michele Colombino, giutà da Luciana Genero e da un bel strop d'amis e colaborator, minca di da Frossach a parto e a rivo un bordel ëd mail, litre, paròle, giornaj, lìber, gent: na rej spantià anti j quat canton dël mond. E peui a-i son ëd giornà coma cola dla Festa dël Piemont ch'a radun-o tute ansema ij piemontèis ëd minca banda për 'l premi "Piemontesi protagonisti". Për ël 2018 a son stàit premià tre giovo, ch'a l'han lassà 'l Piemont për realisé 'l seugn ëd sò travaj "altrove": Elena Alliaudi, da San Second ëd Pinereul a Paris për ël Network di Residenze Reali Europee; Angelica Daneo, da Bricheras al Denver Art Museo (Colorado); Andrea Manavella, da Campiglion a la Apple Inc ëd Cupertino. Piemontèis, ch'a ten-o àut ël drapò 'd nòsta tèra…angagià fòra dal Piemont, fòra da l'Italia… e a l'é na ròba bela e un darmage ansema…La festa a l'é sarasse con n'arcòrd dël poeta Cmillo Brero, parèj da ten-e gropà le paròle dl'ambelessì con le paròle dl'altròve. d'Albina Malerba - da TORINOsette dLa Stampa dij 31 ëd magg dël 2018

Indietro