Salon dël Lìber 2018

Tajà 'l bindel dij 30 ani, nen sensa gran-e e s-ciopon a la fin l'edission dël Salon Antërnassional dël Lìber ëd Turin, ch'a fa 31, a l'é pronta a anandiesse. E i soma sicur che la manifestassion pì avosà e pì bela 'd Turin e dël Piemont për chi a-j veul bin ai lìber e a la coltura, a sarà torna n'edission mossanta, ch'a farà dël Lingòt na librerìa inmensa giaiolà e giojosa e s-cioplinanta: a s'ancamin-a giòbia 10 fin-a a lun-ès 14 ëd magg, da des ore dla matin a eut ore 'd sèira…e peui chi a l'avrà 'ncor fijà e veuja a pudrà spataresse për la sità, dal centro stòrich a le bariere, dai Palass ai pòst pì dròlo, për continué a parlé 'd lìber, për lese ansema, për cangé la Sità an paròle e pagine. Për chi a les an piemontèis a l'é l'ocasion pì galupa e festosa për andé a l'arserca djë Stand che a l'han an giojera ij lìber mal fé da trové ant le librerìe. Blamblinand për ël Lingòt trovroma j'editor Viglongo, Centro Studi Piemontesi-Ca dë Studi Piemontèis, Neos, Alzani, Capricorno, Daniela Piazza, L'Artistica Savigliano, Interlinea, Il Punto-Piemonte in Bancarella, Araba Fenice, Dell'Orso, Fusta, Graphot, Lindau… a son mach citassion campà lì, përchè 'l Salon ëd Turin an cissa a andé a dësnicé j'editor pì segret e originaj. UN BEL DI TUT SÒN…l'ansëgna e l'arzigh dl'edission 31 dël 2018. Bon Salon, bon-e pagine, bon lìber, bon-e paròle! d'Albina Malerba - da TORINOsette dLa Stampa dij 4 ëd magg dël 2018

Indietro