Teàter an piemontèis

I l'hai la bon-a ventura d'esse angagià ant la giurìa dla rassegna 'd Teatro Piemontèis 'd Moncalé, e a fa piasì vëdde coma la sala 'd minca rapresentassion a sìa sempre corma 'd gent. An tut ël Piemont a son un bordel le Companìe che con tanta passion as dedico al teatro, con mach la gòj 'd recité, dë sté ansema, d'amusesse e 'd fé amusé 'l pùblich. Sòn a l'é na bela ròba. Ma cost patrimòni uman e coltural, a andarìa giutà. Për che costa arsorsa a fuissa pì fosonanta për manten-e viva la lenga e la costuma piemontèisa a l'avrìa damanca 'd neuva linfa, a l'avrìa damanca 'd neuv test. Ventrìa che ij tanti poeta e scritor an piemontèis as butèisso a scrive për ël teatro. Na scòla për scritor ëd teatro? Antant le Companìe a pudrìo serché 'd test ant la stòria fiamenga 'd nòst teatro. I segnalo, tant për fé n'esempi, Armando Mottura (Turin 22 d'agost 1905- Turin, 29 d'otober 1976) che oltra che poeta a l'é stàit n'amportant autor për ël teatro piemontèis, darmage an costi ùltim ani pòch arcordà. Soe euvre as peulo trovesse ant ël volum, "Teatro" (Turin, La Slòira-Ca dë Studi Piemontèis, 2009, pp. 560). 7 comedie: "Rossòt" (1931), "L'amor dij giov" (1932), " …e la rova a l'é ancantasse" (1950), "Creature" (1955), "Peul sempre desse" (1956), "Quarantottenne bella presenza", "Girò Fantasìa" (1960). d'Albina Malerba - da TORINOsette dLa Stampa dij 9 ëd mars dël 2018

Indietro