Cusin-a

Për ël Piemont ël 2018 a sarà l'an dël Bocuse d'òr, ël pì avosà concors antërnassional d'àuta cusin-a. Sta cita arvangia a l'é 'dcò mersì a nòsta gent ch'a l'ha savù ten-e bon. E a l'é na ròba bela che as parla 'd bon mangé, 'd cusin-a tradissional, dij nòsti grandi vin. A l'é na manera për vardé a nòste tère (e a tute le tère), con rispet e passion. Sòn a giuta a ten-e dacont lòn che ij Ce a l'han lassane, e che noi l'oma l'òbligh moral ëd masenté an manera 'd trasmëtlo a chi a vnirà dòp. Mi son amusame a sgaté ant le pagine dla leteratura an piemontèis (dai test pì antich fin-a al di d'ancheuj) a l'arserca 'd vers, 'd tòch, 'd pagine sël bon mangé e pì bin bèive: e a l'é na fiorìa galupa 'd test, poesìe ch'a sarìa franch bel fene n'antologìa! Tut un mond ëd fruta, vërdure, salam, pasta, paste, gatò, polaje, quajëtte, carn, pèss, fricandò, pocio, frèise, barbere, dossèt, mossant, paté, bolé, polente… E tòpie e piòle, cusinere, marghé, formagé, artajor, ancioé…Un lessich poetich ch'at buta acòl gòj e gigèt, bin a la tèra, bonimur e… n'aptit da sonador! Ma tnumse curt…i soma an Quaresima. d'Albina Malerba - da TORINOsette dLa Stampa dij 23 ëd fërvé dël 2018

Indietro