Gramàtica e antologia dla lengua piemontèisa e dël dialët ëd Biela

L'autor a l'é Andrea Di Stefano, bielèis, che a l'é angagiasse nen pòch, për dé a le stampe un travajon: "Lege e scrive 'l piemontèis. Gramàtica e antologia dla lengua piemontèisa e dël dialët ëd Biela. Grammatica ed antologia della lingua piemontese e del dialetto di Biella", Lineadaria Editore, Biela, 2017, pp. 642. Tut scrit ant la varianta local dël piemontèis (n'angage dabon fiamengh e pressios), miraco 'l lìber a anteressa an manera particolar ij bielèis e 'l Bielèis, ma sicurament a podrà anteressé 'dcò jë studios e j'apassionà 'd lenge cite 'd tute le part. Ampostà për capìtoj (9 ant tut), venta lese d'amblé lòn che l'autor a scriv "Për ancaminé", e lë scond ch'a presenta "ij régole dla grafia e dla litura dël Bielèis". A la fin na bela partìa 'd test, pròse e poesìe, da Alfonso Sella a Tavo Burat, da Giorgio De Montagu a Maria Pia Coda Forno, Jaco Calleri, ai "piemontèis" Pacòt, Còsta, Brero, Dorato, Còsio, a l'andrera fin-a ai Sermon Subalpin. E pì 'd sent pàgine dedicà al "Glossare". d'Albina Malerba - da TORINOsette dLa Stampa dij 9 ëd fërvé dël 2018

Indietro