Adele Secondino

A së s-ciama Adele Secondino, a l'é na dòna pien-a 'd passion e a l'ha scrit ën lìber, ch'a - va bin - l'é scrit ën bon italian, ma a l'é pien ëd còse piemontèise (e veuj bin dì, 'd còse ch'arson-o dël piemontèis donda a ven-o). Ël lìber, publicà da l'Araba Fenice 'd Beuves (pp. 144, euro 14) a s'ëntitola "Un mondo che era", sot tìtol: "150 anni di storie di Langa ai Grassi di Monforte d'Alba". Na stòria (na micro-stòria), che 'n pò a l'é stòria documetntal, 'n pò l'é stòria përsonal, 'n pò a l'é narassion e 'n pò 'dcò riflession. Vita paisan-a, vita viton-a, vita 'd borgià, vita 'd na comunità che a pòch a pòch as dësperd e a viv la mòrt dle còse, dij temp, dle përson-e, ma nen ëd j'arcòrd ch'a fan ëd la memòria na fòrsa viva 'd resistensa, con tut ch'a basta nen a fé arvive se nen ënt lë scriv-ne, che tutun a l'é nen pòch. Còse, figure, ca, Feliciun e la Venasca, Felicin, can trifolau, e Vigina e papà Giulio e fassism e ij partigian e guera e dòp-guera, tuta na vita, tante vite ch'a vivo e a marco 'l temp, cudì da la scritura. E donca stòrie, stòrie màire e stòrie bele ch'a l'é bel conte-je. E 'dcò dle fòto a compagné coste stòrie gropà a na frassion, ch'a riva forse a conclusion o magara mach - come fortiss, o mèj a s'ënteroga l'autriss, ënt le soe ùltime righe - a na trasformassion. ëd Giovanni Tesio - da TORINOsette dLa Stampa dij 19 ëd gené dël 2018

Indietro