Armanach piemontèis 2018

"Armanach neuv, busiarderie veje": gavoma cost proverbi (e j'autri ch'i sitoma apress) da l' "Armanach piemontèis 2018", soagnà da Sergio Donna e Giuseppe Novajra për le edission Ël Torèt/Monginevro Cultura (ufficio.stampa@monginevrocultura.net), dedicà, për la part dle bigeuje, për l'ani pen-a anandiasse pròpi ai Torèt, le nòste fiamenghe fontanin-e vërde ch'a arfestio tuta la sità 'd Turin. Lo foma përchè në smija che ij proverbi e le manere 'd dì, veje come 'l còco, a la fin a son un sëbròt ëd bon sens, d'una sapiensa ch'a meuir nen, e a la fin dij fin an rendo curios. Mëssonoma un pò 'dsa e an là, për ancaminé l'ani a la mòda veja an manera 'd vardé a l'an ch'a në speta con euj duvèrt, ma 'dcò un pòch ancantà, ai temp ch'a vnirian. Tanti proverbi a riguardo 'l temp, sempe pì baravantan: "Sota l'eva fam, sota la fiòca pan"; "Fiòca 'd gené a fa chërse 'l grané"; "La fiòca a l'é la mare dël gran"; "S'a fiòca 'l di 'd Sant'Antòni, ancor vint di 'd frèid apress". E Sant'Antoni a l'é mèrcol 17 ëd gené, donca preparomse….e vardoma anas savend che "Quand che Superga a l'ha 'l capel, o ch'a fa brut o ch'a fa bel…quand che Superga al l'ha nen dël tut o ch'a fa bel o ch'a fa brut". Bon 2018! d'Albina Malerba - da TORINOsette dLa Stampa dij 12 ëd gené dël 2018

Indietro