Vita dacant e da canté

A l'é na tradission consolidà la Vijà 'd poesìa e mùsica piemontèisa che la Ca dë Studi Piemontèis a organisa tuti j'ani…vers ël Natal. La Vijà 2017 a l'é a l'ansëgna dël Gelindo: "Soma rivà tuti ambelessì për vëdde 'l Bambin", e 'l randevó a l'é ant la Real Cesa 'd San Lorens an piassa Castel a Turin, lùn-es 18 dë dzèmber a eut e mesa 'd sèira (20.30). Protagonista a son: Enzo Vacca (arpa celtica e cant), Valerio Franco (Pive e cant) e l'ator Mario Brusa; an programa poesìe dal Gelindo, da Giovanni Tesio, e "Natal" ëd Renzo Gandolfo, 'l fil d'òr ch'a gropa le Vijà fin-a da quand a son anandiasse quasi për azar ant lë dzèmber dël 1998, al Teatro Carignan. La "Vijà piemontèisa" a l'é dventà ant j'ani na bela tradission, ch'a fa festa, che la gent a speta, come tute le ròbe sempie e bele. Vijà, "veglia", për sente 'l Natal con le vos dla poesìa e dla mùsica che da sécoj a parla an piemontèis, ch'a veul ëdcò esse na festa dla speransa, dl'arcòrd, dla continuità e dl'arnassensa, sicur che le paròle a son nen mach segn o fià, ma a l'han n'anima e na stòria antica. La plaquetta con 'l programa e ij test as peul tiresse giù dal sit http://www.studipiemontesi.it. Anformassion tel. 011/537486; mailto:info@studipiemontesi.it. d'Albina Malerba - da TORINOsette dLa Stampa dij 15 dë dzèmber dël 2017

Indietro