La Guèra dla Sal

Remigio Bertolino a l'é un-a dle vos pì soasìe e conossùe dla leteratura an lenga piemontèisa dij nòsti temp. Originari 'd Montaldo Mondovì, a scriv ant la varianta monregalèisa, e soa euvra a l'é avosà e arconossùa nen mach an Piemont. Na militansa e na fedeltà a la poesìa ch'a l'han radis da la fin dj'ani Stanta dël Neuvsent, e che Remigio a l'ha mai tradì. Ma ancheuj i parloma 'd Remigio Bertolino nen coma poeta, ma për un lìber ch'a l'ha pen-a publicà, na stòria, un "romazo breve", o un "racconto lungo": "L'uomo che raccontava della Guerra del Sale" (introdussion stòrica 'd Michele Ruggiero, Rivoli, Neos Edizioni, 2017, pp. 70, 11 euro). Ël lìber, la conta, a l'é an italian, ma minca pagina a l'ha 'd paròle piemontèise, bin tëssùe ant la trama italian-a; ij pòst dla guèra dla sal (1680-1699) a son ij sò pòst, coj 'd soe poesìe, e a-i é 'dcò na poesìa an piemontèis ch'a l'é na ciadeuvra d'anvìa 'd pas "…Sij camp ëd bataja/ la slòira do temp/ arvira la tèra/ e o sango versà;/ sij bej sògn ëd glòria/ pòvra fio ëd sicòria/ a dindané ar vent..". La stòria, ch'a s'angran-a come un seugn tragich e potich, "come un intreccio di misteri di un rosario di dolorose ferite ancestrali", a l'ha l'andament e la dosseur ferìa e 'ncantà da lese adase come le poesìe 'd Remigio Bertolino. d'Albina Malerba - da TORINOsette dLa Stampa dij 6 d'otóber dël 2017

Indietro