Salon dël lìber 2017

La stòria a l'é bela e a fa paisì armarchela: a la fin l'edission dël Salon Antërnassional dël Lìber ëd Turin, ch'a festegia ij trant'ani d'una dle manifestassion pì avosà e pì bele 'd Turin e dël Piemont për j'amis dij lìber e dla coltura, nen mach as farà, ma a sarà da coma a s'anonsia n'edission mossanta, ch'a surtirà 'dcò fòra dal Lingòt: ël salon a sara a eut ore 'd sèira për spataresse për la sità, dal centro a le bariere, dai Palass ai pòst pì dròlo, për continué a parlé 'd lìber, për lese ansema, për arpijesse la sità con le paròle. Dòp ij di dla delussion, dl'amarëssa, tutti ij bogianen, la Sità, la Region, le Fondassion a son argaucciasse le manie e donca 'l randevó a sarà al Lingòt da giòbia 18 a lun-ès 22 ëd magg. E a sarà ancora un-a dle manifestassion pì galupe 'd tut l'ani për chi a l'ha la passion, o 'l visse, dla carta stampà e a s'amusa a lese: a në speta na festosa baraonda dë stand e montagne 'd pagine, na giojera 'd gòj e 'd piasì për j'euj, la ment, ël cheur. Coma sempe noi anvitoma ij nòsti letor a visité jë stand dj'editor ch'a l'han 'l corage e as pijo l'arzigh ëd publiché an piemontèis. Na mëssonoma chijdun: Viglongo, Centro Studi Piemontesi-Ca dë Studi Piemontèis, Neos, Alzani, Capricorno, Daniela Piazza, L'Artistica Savigliano, Interlinea, Il Punto-Piemonte in Bancarella, Araba Fenice e via fòrt; e st'ani a-i é 'dcò në spassi dedicà a j' "Istituti culturali", con an continuassion presentassion ëd lìber sul Piemont. A son mach sugeriment, përchè 'l bel dël Salon ëd Turin a l'é pròpe col d'andé a la serca dj'editor pì bej e segret. Alé! d'Albina Malerba - da TORINOsette dLa Stampa dij 12 ëd magg dël 2017

Indietro