2-nd laboratòri 'd piemontèis

L'Università ch'a bogia e che an pias. Dòp la bon-a esperiensa dl'edission 2015/2016, a son anandiasse 'l 27 d'avril a Palass Neuv, sede dle Facoltà Umanistiche dl'Univeristà 'd Turin, le lession dlë scond "Laboratorio di piemontese", vorsù da la Ca dë Studi Piemontèis mersì a un finansiament privà dedicà. A l'é për jë student dla laurea magistral an "Scienze Linguistiche del Dipartimento di Studi Umanistici", ma a peulo scrivse 'dcò student d'àutri cors ëd laurea. Ëdcò 'l "laboratòri" 2016/2017 a l'é masentà da Nicola Duberti, bin conossù sia ant ël camp djë studi filològich e dialetològich, sia come poeta an piemontèis, ch'a fa arferiment a la "scòla" poetica monregalèisa. Antant Nicola Duberti a l'ha prontà na "dispensa"- coma a së s-ciamavo na vòta - ch'a smon ant neuv Càpitoj le lession dl'an academich 2015/2016, che la Ca dë Studi a l'avrìa la volontà 'd publiché për condividje con tuti. Për col apen-a ancaminà Nicola Duberti, dacant a le chëstion pì lenghistiche e gramàticaj, a l'ha butà an programa un tema leterari motobin anteressant: "Le fomne ant la literatura piemontèisa: bërnufie, bon-e dòne, mare grande e bele sìngrie", da Isler ai nòsti di. Për savèine 'd pì serché an internet "laboratorio di piemontese unito", o serché Nicola Duberti ant vòsta Università. E noi na parleroma ancora. d'Albina Malerba - da TORINOsette dLa Stampa dij 28 d'avril dël 2017

Indietro