Primo Levi

L'11 d'avril a l'é trant'agn ch'a-i é pì nen ma duvrìa dì ch'a-i é pì che prima, përchè soa euvra a së spantia, a viagia, a ven lesùa daspërtut. Parlo 'd Primo Levi. E se na parlo sì a l'é për tante rason: përchè a l'é n'autor piemontèis, con tut ch'a l'abia pijà 'l vòl dël mond; përchè a l'é pa mach n'autor dla "testimoniansa", ma n'autor ch'a l'ha savù ten-e cont dle mila nuanse dl'òm (e fin-a d'esse në scritor umorìstich, coma fortìa Massimo Mila parland-ne 'l di d'apress ëd soa mòrt); ma pì che tut - ambelessì - përchè a l'é n'autor ch'a l'ha vorsu-je bin al piemontèis, sensa gena e sensa esageré. Tante vòte a l'ha scrivu-ne. Arcòrdo 'n particolar l'artìcol "Bella come una fiore" ch'a l'ha publicà 'n sla "Stampa" - 'l sò giornal - ël 13 'd luj dël 1986, 'ndoa a parlava dël "mè piemontèis" e 'd tante còse gropà a costa soa passion lenghistica. Ma 'd pì 'ncora arcòrdo il piemontèis italianisà 'd Libertino Faussone, 'l protagonista dla "Chiave a stella" opurament l'istess piemontèis italianisà dël ciavatin d'"Arsenico", un-a dle conte dël "Sistema Periodico". Sensa conté le paròle o le manere 'd dì ch'a sàuto fòra da le pagine 'd cost o col lìber, e ch'a son pi gropà al dì 'd mica di. Paròle ch'a seurto pì d'àute da na cossiensa lontan-a, familiar, e resistente come ij ròch eràtich ën montagna. ëd Giovanni Tesio - da TORINOsette dLa Stampa dij 7 d'avril dël 2017

Indietro