Andrea Flamini

Giandoja a peul nen meuire. Andrea Flamini che për na longa partìa d'ani a l'ha ancarnà 'l Giandoja dla tradission piemontèis, nen la maschera, ma la "vos coral" dla gent piemontèisa, a l'é partisne, an broa dla Prima ch'a s-ciodìa, për sò "altrove". Dabon a smijava nen na sepoltura, ma una dle tante manifestassion che Chiel a l'ha 'nventà e a l'ha soagnà për quasi sinquant'ani, cola dla matin dël 22 'd mars al Camposanto Parch ëd Turin: drapò piemontèis ch'a svantavajo, Giacomëtta, grop an costum stòrich, cavaj e cavajer ch'a scortavo la vitura, e le canson piemontèise come un bësbij, na preghiera, na bin làica ch'a s'aussava adase vers ël cel a compagné "ij seugn d'un bogianen". E ant un moment tuti ij sagrin ch'a l'han bolversà ij sò ùltim mèis a son smasisse ant ij cheur e ant le ment ëd tuta la gent che a j'era lì për saluté Giandoja, për fortì che la stòria dl'Associassion Piemontèisa a dev nen andé dëspersa. A l'é stòria popolar dla sità e dël Piemont. Për onoré l'angage 'd na vita adess a venta salvé 'l patrimòni 'd lìber, materiaj, archivi, costum, document, përchè Giandoja a peul nen meuire, a dev nen meuire. Onor a Ginadoja, onor a Flamini, e che la tèra at sìa legera…antant che la bon-a bataja a va anans… d'Albina Malerba - da TORINOsette dLa Stampa dij 31 ëd mars dël 2017

Indietro