Salvatore Viviani

La Sità 'd Seto Turinèis, che, darmage, për un pluch a l'ha nen vagnasse l'angage 'd capital dla coltura italian-a 2018, ma a l'é piassasse tra le prime des për soe inissiative colturaj mossante, slargà, moderne, sensa dësmentié soe rèis. Vënner 3 ëd mars, a 9 ore 'd sèira, ant la Sala Primo Levi dla Biblioteca Archimede, a rend omagi, a des ani da la mòrt, al sò poeta an piemontèis Salvatore Viviani (1920-2007). La Sità, la Fondassion ECM, la Biblioteca Cìvica, 'l Gruppo Ricerche Etnografiche Settimesi e la Famija Setimèisa, a l'han soagnà na manifestassion ch'a ricorderà Viviani come poeta, ma 'dcò coma përson-a che sempe a l'ha angagiasse për soa sità, sota la "Tor antica, ch'a goerna le memòrie, ògni mon a sa le stòrie..". Ansema al Sìndich, Fabrizio Puppo, al President dla Fondassion ECM, Aldo Corgiat Loia, a Silvio Bertotto, Carlo Fomento e Paolo Silvetti ("regista" e anima dl'inissiativa) a-i sarà l'ator Mario Brusa ch'a lesrà un bochèt ëd poesìe 'd Viviani, e 'n pòch ëd mùsica con La Corale Sette Torri. La sèira a veul ëdcò esse n'anvit a la Sità për ch'a ven-a antititolà a Salvatore Viviani, cantor ëd Seto, 'd soa gent, ëd soa stòria, na contrà sitadin-a…për ch'as goerna l'arcòrd "con la colin-a e 'l Pò davsin, davsin/ ël cel quaich vòlta piturà 'd turchèis". d'Albina Malerba - da TORINOsette dLa Stampa dij 3 ëd mars dël 2017

Indietro