An làuda ‘d nòsta stòria

"An làuda 'd nòsta stòria" a l'é 'l bel tìtol ëd na bela inssiativa cudìa da Gioventura Piemontèisa (anformassion e arzervassion: 339-2100604, giovpiem@yahoo.it) për arcordé l'inisse dij "Brandé" un-a dle arviste pì 'mportante dla nòsta stòria literaria, artistica, cultural, nà novant'agn fa; un dij grup - da Pacòt a Gallina a Olivero a Formica - ch'a l'han fàit la stòria dël piemontèis pì modern. A na parleran ël prim ëd mars a sinch ore 'n palass Sisterna (contrà Maria Vitòria 12) testimòne e studios come Censin Pich, Sergi Gilardin, Giusep Gorìa, Gianfranch Gribàud, Albina Malerba, Dario Pasé, Michél Pont, Candida Rabbia e a leseran na sèrnia 'd pagine Rosanna Galleggiante e Giorgio Serra. 'N bel bocc 'd përson-e ch'a l'han continuà - ognidun ant ël sò e cheidun ant le associassion ch'a l'han cissà e ch'a continuo a cissé - a fé sente na lession che da Pacòt, ël Mistral piemontèis, a l'ha arnovà 'n përfond la poesìa piemontèisa (ciapand na generassion pì giovo, da Bré, 'n magister, a Gioanin Morel e a Tavo Burat, n'àut magister passionà). Ma nen mach. A l'é giusta dai "Brandé" (la "fiama ch'as dëstissa nen") ch'arnass la cognission d'un piemontèis d'orgheuj, rivand a na grafìa bin forgià e pensand a l'òbligh ëd cariesse 'n gròss badò për na resistensa antica. Neuva. ëd Giovanni Tesio - da TORINOsette dLa Stampa dij 24 ëd fërvé dël 2017

Indietro