Bersezio e La Stampa

An costì dì "La Stampa" a l'ha fàit festa për ij 150 ani da soa fondassion. Coma a l'é stàit arcordà, e coma a conta la Mostra che fin-a a magg as peul visitesse a Palass Madama, le rèis antiche dël giornal a l'han na data e un fondator: 'l 9 ëd fërvé del 1867 con tìtol "Gazzetta Piemontese", prim diretor e fondator Vittorio Bersezio. Col Bersezio che miraco ancheuj a l'é pì arcordà për la ciadeuvra teatral "Le miserie 'd monsù Travet", rapresentà dël 1863, n'an prima che la Capital da Turin a fèissa sanmartin. Vittorio Bersezio a l'era nà a Povragn (Peveragno) dël 1828, ma già a l'età 'd ses ani a l'era trasferisse a Turin con la famija e tra la Capital, Madòna dl'Olm e Moncalé (con na bela esperiensa an Fransa coma giornalista al "Courrier Franco-Italien" e al "Courrier de Paris"), as forma soa esperiensa politica e coltural ch'a lo fa un d' inteletuaj tra ij pì avosà 'd sò temp. A meuir ël 30 'd gené dël 1900 e a ripòsa ant ël Camposanto 'd Moncalé. A Bersezio a l'é antitolà na Fondassion a Turin, e la Comun-a 'd Povragn ant soa Ca natal a l'ha alestì 'l Museo Toselli-Bersezio. Un monument, euvra 'd Leonardo Bistolfi, a lo arcordrà për sempe a chi a passa për la stidadin-a dla Provincia Granda. La pera ch'a dura… d'Albina Malerba - da TORINOsette dLa Stampa dij 17 ëd fërvé dël 2017

Indietro