Batista e Gioanin

Amis piemontèis ancheuj nen bon-e neuve. Ma l'arcòrd e 'l salut a doi dij nòsti, ant la fiorìa dj'ani e dl'angage, ch'a son passà ant l'infinì dël temp. La mòrt a l'é 'l grand misteri dla vita, la mira 'd tute le esistense, ma quand col misteri tremend a ancrosia nòste strà e a ranca via ij nòstri amis pì car, a l'é franch mal fé fesne na rason. Për noi che i l'oma a cheur nòsta tèra e la lenga piemontèisa a l'é staita na foetà la notissia, rivà an broa a Natal, dla dipartìa 'd Batista Cornaja, un dij giovo ch'a l'ha brandà tant për ël piemontèis, e a l'ha sislà un-a dle pì bele Feste dël Piemont a l'ansëgna "Piemontèis lenga dël cheur" tnusse a Cherasch dël 2008. An resto soe canson corme d'energìa e 'd passion. L'an bisest a finiss (ma 'l proverbe a diss: guardte da col ch'a-i ven apress!) e subit ant le prime tornà dl'ani neuv a Borian-a 'd Biela, a l'é dëstissasse la vos ëd Gioanin Ross. Con chiel e con soa associassion, fondà 25 ani fa, Ël Sol dj'Alp i l'oma travajà tanti ani për ij cors ëd piemontèis ant le scòle. Antor a Chiel, sovratut dòp la mòrt ëd Tavo Burat (gran magister ëd poesìa, 'd siviltà, 'd piemontèis, ëd minoranse), a l'era mantnusse viva la tradission coltural pì genita dël bielèis e dël Piemont, con tante inissiative come la Giojera piemontèisa, le Vijà, le Feste dël Sol dj'Alp, la publicassion dl'arvista "Tron e lòsna". N'angage ch'a l'é stàit ël sens e la saiva 'd tuti ij di dla vita 'd Gioanin Ross. Dòp ël dolor, ël sens dle còse che tute a finisso, a-i é da speré che a Biela come ant j'aviron dë Scaparon (ant le Langhe albèise), chijdun a peussa porté anans ël travaj, la testimoniansa, la passion piemontèisa 'd Batista e 'd Gioanin. A noi la testimoninsa dl'arcòrd. Che la tèra, la nòsta tèra, av sia legera e a conserva vòsta grassia. d'Albina Malerba - da TORINOsette dLa Stampa dij 3 ëd fërvé dël 2017

Indietro