Gipo

Alessandro Castelletto a l'ha butà 'nsema con inteligensa col che 'ncheuj a ciamo "docu-film" su Gipo Farassino. Na pelicola bin cudìa ch'an presenta le tante face d'un dij protagonista dla coltura piemontèisa dlë scond Neuvsent. Cantant (ma as pudrìa dì 'd bon giust chansonnier o 'dcò contastòrie, o torototela 'n sens àut), ator, polìtich (combin che tutun a sia nen stàita costa soa part pì 'mportanta), poeta e scritor a soa manera, e pì che tut òm d'un caràter ëd fer, che soens a veul dì 'n caràter difìcil, ma bon a cheuje dla vita 'l sust pì përfond. Ebin, Castelletto a l'ha contane Gipo con la facia 'd Luca Morino, col dij Mau Mau, e veuj bin dì che cola facia 'd Morino ch'an conta Gipo a l'é na facia dura e squasi misteriosa ch'a parla tan con pòch e a mi a l'é piasume. Gavà 'd serti moment un pò da teatro popolar, a më smija 'd podèj dì che 'sto "docu-film" a fassa 'n bon servisse. Veuj tutun sotligné che Gipo a l'é stàit òm 'd bariera - barierant - e sossì Castelletto a lo dis bin, ma mi a sarìa piasume ch'a-i fùissa 'dcò chèich considerassion 'nsima a la tradission piemontèisa che Gipo a l'é portasse a còl: na tradission ch'a l'ha fàit ëd chiel n'òm bon a cariesse la responsabilità - da Brofferio a Pietracqua - dla canson piemontèisa. ëd Giovanni Tesio - da TORINOsette dLa Stampa dij 13 ëd gené dël 2017

Indietro