Poisìe 'd Natal

Am fa gòj saluté ij nòsti letor, an cost ùltim numer dël 2016, con un bochèt scarpentà e baravantan ëd vers an piemontèis, ciapà un pòch da sì e un pòch da là da autor divers, ch’an parlo an piemontèis dël Natal, dl’invern, dl’ani ch’a finiss e ‘d col ch’a ven a ancaminesse, për dì a tutti n’augure ‘d bin. «L’é ‘l bergé dij bergé, l’é ‘l Bon Pastor,/ l’é col ch’an deurv e an sara le parpèile;/man man ch’a passa a fa sponté le stèile/ch’a jë s-ciòdo d’antorn parèj dle fior..»; «S’i veuj scrive ‘n sonèt ëd Natal/am piass ch’a l’abia la blëssa dl’asnòt/ch’as na sta lì a bufé ‘nt un cunòt/doa a sgambita ‘n citin virginal…»; «Giornà ëd lus e ’d bej seugn ël Natal:/front che as chin-o a lë s-ciòde dla vita/maravija, misteri, stupor,/euj ch’as deurvo a la fàula novela,/al fiorì dle ilusion e dl’amor/che a s’ antërso su tuta la tèra/s’na famija ’d creature vivente/ambrassanda ij fij ëd j’erbe e le ronze,/ij but che a ponto possà da la saiva/ij nì càud che a gasojo e le serp./E se a rij ël Fantin/ch’a l’é ’l Re dl’univers,/creator creatura,/fiòche e vènt e maleur, tut as pàsia,/ij carbon ëd le pen-e as dëstisso,/àuta a brila la stèila bërgera,/ël desert a s’ancanta e a frisson-a/e a s’anàndio ij gamej dij Re Magi…»; «Ël prim bon-dì-bon-ann/venta podejlo dì a n’òm con ël capel/- mej se ‘mbiavà –/la matin ‘d Capdann …»; «Ënvern,/temp da armita./Pèi ’d n’ancioa/im no stògn/ënt la cusin-a…»; «Che còsa bela avej un cheur ch’a canta,/avej la poesìa andrinta a j’euj/savej cheuje le fior/ciucé l’amel/vëde, sërché,/voréj trové/an tut/e sempre/ël mej…». Bon-e Feste! d'Albina Malerba - da TORINOsette dLa Stampa dij 23 dë dzèmber dël 2016

Indietro