Un lìber për Natal

Nonsià da un bel tilèt con soa ansëgna declinà a lus d’artista (ideà da Daniela Rissone), la Ca dë Studi Piemontèis a anvita, a parte da lùn-es 12 dë dzèmber a 11 e mesa dla matin, a la mostra ‘d lìber «Un libro per Natale», për ansighéne a fé cadò, regalé un lìber, ch’a l’é un dij gest pì bej – e miraco ancora bastansa a bon pat – ch’ a fa bin e a dura ant ël temp. Na gran giojera ‘d lìber sël Piemont e an piemontèis, stòria, poesìa, art, cusin-a… tanti tìtoj neuv e ‘d catalògo, mal fé da dësnicé e vardesse adase ant le librerie. Coma sempe as trovrà ‘l Calendari «Memòria dël temp» 2017 con le bele fòto d’antan dl’editriss Il Punto/Piemonte in Bancarella; e peui la ciadeuvra «Repertorio Etimologico Piemontese-REP» (për chi al l’avèissa ’ncor nen); le conte «Pere gramon e lionsa» ‘d Tavìo Còsio, ristampà da pòch; l’antologìa’d lirìche dl’antica Provensa ‘d Marco Piccat, e tute le edission veje e neuve dla Ca dë Studi Piemontèis; le poesìe ‘d Nino Costa e vàire d’ àutri tìtoj dl’editor Viglongo; ‘l «Viaggio in Piemonte» dël Rovere dl’Artistica editrice; ‘l lìber su ij «Torèt» ‘d Sergio Donna, con le canson ëd Novajra, dle edision dël Torèt-Associasison Monginevro; lìber dla Società Stòrica dle Valade ‘d Lans; ‘d Vivant, e ‘d tanti d’àutri cit editor. Nen un mercà, ma n’itinerari d’anima e cheur dë stòria, ‘d paròle, inmagini ‘d tut ël Piemont e dj’antich Stat Sabaud (dal 12 al 22 dë dzèmber; për anformesse dj’orari: tel. 011/537486; info@studipiemontesi.it; http://www.studipiemontesi.it). d'Albina Malerba - da TORINOsette dLa Stampa dij 9 dë dzèmber dël 2016

Indietro