Viglongo al Salon

A l’é stàita pròpi na ròba bela e giusta che ‘l Salon dël Lìber, an mes a un bordel d’inissiative e ‘d feste, e ‘d paròle, e ‘d pagine, a l’abia dedicà n’omagi a Giovanna Viglongo, «Decana degli editori italiani. La “signora dei libri” che ha saputo restare fedele alla qualità e all’impegno intellettuale di un marchio storico della cultura torinese ». Tuti ij piemontèis, e nen mach, che an costi 29 ani sonà a son passà dal Salon, prima a Turin Esposission e peui al Lingòt, a l’han nen podù fé meno d’andé a trové Giovanna Viglongo, sempe a l’avàit, sempe an piòta, con soe ormai tante primavere an sle spale, al Salon a l’é sempe stàita lì a presidié sò stand, cit ma pien ëd grassia e d’un mar ëd lìber piemontèis e an piemontèis, prim fra tuti l’euvra dël grand poeta dël nòst Neuvsent Nino Costa. La Ca Editriss a l’é stàita fondà da Andrea Viglongo dël 1945, e an soa giojera oltre a Costa a l’ha tuti ij romans stòrich ëd Luigi Gramegna, j’Armach Piemontèis, che an manco tant, Salgari…e tanti àutri autor piemontèis. Dòp l’Omagi a Giovanna, a sarà la Biblioteca ‘d Murello, ‘l 27 ëd magg a 8 e mesa ‘d sèira a festegé jë 70 ani d’atività dla Viglongo Editore, con Davide Damilano, Antonio Tavella, Agostino Righetto, Pierbartolo Piacenza, le mùsiche ‘d Giovanni e Alice Acchiardi, e con Franca e Giovanna Viglongo (info 333/417.98.45). d'Albina Malerba - da TORINOsette dLa Stampa dij 20 ëd magg dël 2016

Indietro