Arviste an piemontèis

La vitalità ‘d na lenga as misura prima ‘d tut da vàire la gent a la parla e an che contest. Për ël piemontèis i soma butà mes-mes, ma i soma ‘ncor nen lì për tiré ij baj. E peui a conto ij lìber, ij giornaj, le riviste. E an cost camp ël Piemont miraco a l’é un-a dle region ch’a peul vanté na presensa e na vitalità sconda a gnun. Dij lìber, cd, armanch, sit internet, studi, sovens i na doma notissia an costa rubrica. La ròba ch’a colpìss a l’é ch’a seurto regolarment giornaj e arviste, chijdun a l’han mach «ël canton», d’àutri a son scrit tut an lenga piemontèisa. I segnaloma për ancaminé: «La Slòira», arvista piemontèisa dl’Associassion Coltural La Slòira (Stra Turin, 82 – 10015 Ivrèja; telef. e fax 0125/43082; grafiche@bolognino.it; abonament për l’an 25 euro), ch’a seurt minca tre mèis, e a l’é masentà, nen sensa sagrin, da Censin Pich e Dario Pasero, colaborassion ëd Giusep Gorìa, Sergi Gilardin, Càndida Rabia ecc. E ‘l mensil ‘d poesìa e ‘d coltura ‘nt le lenghe dël Piemont, fondà da Milo Bré, «Piemontèis Ancheuj», publicà dal Centro Studi Don Minzoni (strà ‘d Settimo 92, 10156 Turin, telef. 011/2238112; fax 011/2731822, piemonteis.ancheuj@viriglio.it; abonament 35 euro), dont a l’é pressident Corrado Marra, e a-i colaboro an tanti da Beppe Lachello a Michele Bonavero, da Ferdinando Viglieno Cossalino a Sergio Notario e vàire d’àutri, tuti, coma coj dla Slòira, ch’a travajo për la glòria! Venta deje na man, abonesse e lesie, për giuté a ten-e avisca la fiama, coma a disìa Pinin Pacòt. d'Albina Malerba - da TORINOsette dLa Stampa dj'8 d'avril dël 2016

Indietro